Giornale radio

Ultimo TgR

VUÊ O FEVELìN DI…

Un program di atualitât, costum, culture e societât, in onde ogni dì: dal lunis al vinars,  aes  11.09 di buinore (par  dîs minûts) e daspò misdì aes 15.15.


L'appuntamento quotidiano in lingua friulana.  10 minuti  la mattina alle 11.09 per mettere a fuoco un problema, con l'aiuto degli ospiti, o per segnalare una novità; 20 minuti il pomeriggio, dalle 15.15 alle 15.35 sull'attualità culturale in Friuli.


SCOLTE E DISCJAME LIS PONTADIS




h. 11.09


LUNIS 15 AVRîL Speciâl dedicât ae Pasche. Operadôrs sanitaris, vigjii dal fûc e fuarcis dal ordin saran a vore par garantî la nestre sigurece ancje a Pasche. Bisugne stâ atents, il Lunis di Pasche, cuant che o larin in gjite o a fâ il ghiringhel intai cjamps, di no piâ fûcs cence cjâf. Atenzion parcè che boscs, arbui ma ancje la jerbe podin cjapâ fûc in curt.  In colegament telefonic Valmore Venturini, responsabil de comunicazion dal comant provinciâl dai vigjii dal fûc.


MARTARS
16 AVRîL Fevelin cui operadôrs sanitaris di cemût passâ dôs zornadis di fieste in sigurece:  Pasche e ancje il Lunis di Pasche. Bisugne fâ atenzion ai incidents stradâi ma al è impuartant ancje stâ atents a no mangjâ e bevi masse cuant che o vin di lâ a gustâ in ristorant o a cjase nestre. In colegament Diego Modesti, president de Crôs Verde Bas Friûl.


MIERCUS 17 AVRîL
Al è rivât il cjalt e cul aument des temperaduris, de lûs e de umiditât tornin fûr ancje lis raspulis. Fevelin de impuartance de prevenzion par ridusi il risi di cjapâ su cualchi malatie cun Maurizio Ruscio, diretôr dal dipartiment di medisine di laboratori de aziende sanitarie universitarie di Triest e diretôr dal laboratori unic di Asuit Triest Burlo Monfalcon Gurize.


JOIBE 18 AVRîL
Adun cun Raimondo Englaro, president dal Moviment difese dal citadin dal Friûl Vignesie Julie, fevelin de cualitât dai ûfs di Pasche e dal fat che cuant che comprin un ûf di Pasche vin di stâ atents ae cualitât de cjicolate ma ancje a lis sorpresis, che podin deventâ un pericul pai plui piçui. In colegament il president regjonâl dal Moviment difese dal citadin dal Friûl Vignesie Julie, Raimondo Englaro.


VINARS 19 AVRîL
Fevelin di fede intun timp caraterizât di vueris di religjon, conflits e problemis leâts ae imigrazion e acet. Une riflession sul significât plui profont de Pasche. In colegament don Pierluigi Di Piazza, che al à fondât il centri di acet Ernesto Balducci di Çuian.
 

 

 

h. 15.15  

 

 

LUNIS Al 15 DI AVRîL Segnalâ i miôr progjets sui temis de edilizie publiche, de abitazion, dal furniment urban e de architeture dai internis realizâts in Friûl-Vignesie Julie e promovi une riflession, su la art dal costruî, insiemi ai puartadôrs principâi di interès (lis scuelis di architeture, i produtôrs, lis aministrazions publichis). Al è il dopli fin de associazion “Architets dal Friûl-Vignesie Julie – Art&Architeture”, che e organize ancje chest an la “Rassegne bienâl di architeture – Premi Marcello D’Olivo”, visitabile inte vecje glesie di Sant Francesc, a Udin, fin ai 5 di Mai. In program ancje une schirie di iniziativis e mostris colaterâls.

Da “Lis predicjis dal muini”, opare di pre Josef Marchet, l’atôr Fabiano Fantini al leiarà: La dolce vite di Gargagnà.

 

MARTARS AI 16 DI AVRîL Il traume di vuere dilunc dal prin conflit mondiâl in Friûl-Vignesie Julie al è stât ogjet di un progjet di studi che al à cjapât dentri un grup di ricercjadôrs de Universitât di Udin traviers la ricostruzion storiche e culturâl de vicende de Universitât Castrense di Sant Zorç di Noiâr, une scuele mediche di cjamp istituide intal 1916 intal comun furlan, che e à costituît la prime esperience di formazion universitarie sul teritori. Il progjet, inviât intal 2017, al à puartât ae valorizazion de ecezionâl documentazion conservade a Sant Zorç di Noiâr cu la realizazion di un archivi digjitâl de Universitât Castrense.

Da “Lis predicjis dal muini”, opare di pre Josef Marchet, l’atôr Fabiano Fantini al leiarà: Barufe cul plevan.

 

MIERCUS AI 17 DI AVRîL Passâts i trente agns, il Premi leterari nazionâl “Giuseppe Malattia della Vallata” za l’an passât al à cambiât formule, pontant su la produzion poetiche intes lenghis minorizadis e intai dialets talians. La sielte, ae aparence un azart, e je stade chê juste cjalant la cuantitât des oparis in concors, ma massime la lôr cualitât, superiôr – pe jurie – di chê dai lavôrs in lenghe taliane. II “Malattia della Vallata” e va indevant su cheste linie ancje chest an e al conferme il Premi “Pierluigi Cappello”, par ricuardâ il poete che nol è plui, grant amì de Valciline. La scjadince pe presentazion des oparis e je fissade pai 21 di Mai.

Da “Lis predicjis dal muini”, opare di pre Josef Marchet, l’atôr Fabiano Fantini al leiarà: La patrie.

 

JOIBE AI 18 DI AVRîL La cuarantesime otave edizion dal Pali teatrâl studentesc “Citât di Udin” dedicade a Angela Felice, Ciro Nigris e Rodolfo Castiglione e à viert une gnove stagjon di sperimentazion e inovazion culturâl, cjapant gnûfs e vecjos interlocutôrs, tornant a partî dal invistiment culturâl, civîl e teatrâl sui zovins, vocazion primarie de gjestion dal Teatri Club impuestade dai “paris fondadôrs” e puartade indevant di Angela Felice. La manifestazion teatrâl plui antighe di Udin e torne dai 27 di Avrîl ai 28 di Mai cul festival che, tant che ducj i agns, al viodarà grups teatrâi studentescs in sene cuasi ogni sere al Palamostre.

Da “Lis predicjis dal muini”, opare di pre Josef Marchet, l’atôr Fabiano Fantini al leiarà: Il cur e une staipe.

 

VINARS AI 19 DI AVRîL La Risierve naturâl regjonâl dal lât di Curnin e scree la gnove stagjon. In program – di lunis di Pasche a Nadâl – tantis iniziativis a teme, laboratoris didatics, visitis vuidadis, mostris e progjets impuartants di conservazion. Si partìs ai 22, ai 25 e ai 28 di Avrîl cun “La zornade mondiâl de tiere” ae scuvierte de Risierve cuntun gjeolic, un botanic e un espert di faune, par rivâ ai 9 di Jugn a un dai apontaments plui spietâts, il “Griffon Day”, dedicât al volatil plui grant des Alps, e sierâ la stagjon ai 24 di Dicembar, cu la tradizionâl messe su lis rivis dal lât. 

Da “Lis predicjis dal muini”, opare di pre Josef Marchet, l’atôr Fabiano Fantini al leiarà: La caritat.

 

 



TI PODARÈS INTERESSÂ ANCJE


OBIETTIVO FRIULI

CASA FRIULI

ROTOCALCO INCONTRI

  • A CURA DI

    CLAUDIA BRUGNETTA

  • AL MICROFONO

    ERIKA ADAMI E NICOLA ANGELI

  • CONTATTI

    Tel: +39 0432 627669
    furlan@rai.it
    claudia.brugnetta@rai.it